माझें ह्मणतां याला कां रे नाहीं लाज । कन्या पुत्र भार्या धन वित्त ॥१॥ कोणी सोडवी ना काळाचे हातींचे । एकाविणें साचें नारायणा ॥२॥ तुका ह्मणे किती सांगावें चांडाळा । नेणे जीवकळा कोण्या जीतो ॥३॥

मुलगी, मुलगा, बायको, धन-दौलत — या सगळ्यांना 'माझे माझे' म्हणताना तुला लाज कशी वाटत नाही? काळाच्या हातातून खरोखर सोडवणारा एकमेव नारायणाशिवाय दुसरा कोणीही नाही. तुकाराम महाराज म्हणतात, या करंट्या माणसाला किती वेळा सांगायचे? ज्या जीवनशक्तीने आपण जगतो आहोत, तीही त्याला नीट कळलेली नाही, आणि तरी हा उगाच मालकी सांगत बसतो.