पतित पतित । परी मी त्रिवार पतित ॥१॥ ॥ ध्रु. ॥ परी तूं आपुलिया सत्ता । मज करावें सरता ॥२॥ नाहीं चित्तशुद्धि । स्थिर पायांपाशीं बुद्धि ॥३॥ अपराधाचा केलों । तुका ह्मणे किती बोलों ॥४॥

पतितांमध्येही पतित, मी तर तीनदाही (मनानं, वाणीनं, कृतीनं) पतित आहे ॥१॥ धृ.॥ पण तूच आपल्या सामर्थ्यानं मला उद्धरून टाक ॥२॥ माझ्या चित्ताची शुद्धी झालेली नाही, बुद्धी तुझ्या चरणांपाशी स्थिर नाही ॥३॥ मी अपराधांचाच पुतळा झालोय; तुकाराम म्हणतात, किती सांगू? ॥४॥