लाहानपण दे गा देवा । मुंगी साखरेचा रवा ॥१॥ ॥ध्रु.॥ ऐरावत रत्न थोर । तया अंकुशाचा मार ॥ ज्याचे अंगीं मोठेपण । तया यातना कठीण ॥२॥ तुका ह्मणे जाण । व्हावें लाहनाहुनि लाहन ॥३॥

देवा, मला लहानपण दे - मुंगीला साखरेचा एक कणसुद्धा पुरेसा असतो. ऐरावतासारखा मोठा, मौल्यवान हत्ती असला, तरी त्याला अंकुशाचा मार सोसावा लागतो. ज्याच्या अंगी मोठेपण असते, त्यालाच जास्त कठीण यातना भोगाव्या लागतात. तुकाराम म्हणतात, हे नीट लक्षात ठेव - लहानाहूनही लहान व्हावे, हेच खरे शहाणपण.