ऐसी जिव्हा निकी । विठ्ठल विठ्ठल कां न घोकी ॥१॥ ॥ ध्रु. ॥ जेणें पाविजे उद्धार । तेथें राखावें अंतर ॥२॥ गुंपोनि चावटी । तेथें कोणा लाभे भेटी ॥३॥ तुका ह्मणे कळा । देवाविण अमंगळा ॥४॥

अशी ही सुंदर जीभ आहे, मग विठ्ठल विठ्ठल का घोकत नाहीस? ज्याने उद्धार (मुक्ती) मिळतो, तिथेच मन राखून ठेवावे. फुकटच्या गप्पांमध्ये गुंतले की तिथे कुणाला देवाची भेट होते? तुकाराम म्हणतात, देवाशिवाय सगळी कलाच अमंगळ, निरुपयोगी आहे.