मातेचीं जो थाने फाडी । तया जोडी कोणते ॥१॥ ॥ध्रु.॥ वेदां निंदी तो चांडाळ । भ्रष्ट सुतकीया खळ ॥ध्रु.॥ अगी लावी घरा । मग वसती कोठे थारा ॥२॥ तुका ह्मणे वर्म । येरा नाचवितो भ्रम ॥३॥

जो स्वतःच्या आईची स्तने फाडतो (ज्याने आपल्याला जन्म दिला, पोसले, त्यालाच इजा करतो), त्याच्या हाती काय लागणार? जो वेदांची निंदा करतो, तो चांडाळासारखा, कायम अपवित्र व भ्रष्ट असा दुष्ट माणूस समजावा. जो स्वतःच्या घराला आग लावतो, त्याला मग राहायला जागाच उरत नाही. तुकाराम महाराज म्हणतात, हेच खरे मर्म आहे; पण मूर्ख माणूस मात्र उगीच भ्रमात नाचत राहतो.