अमर आहां अमर आहां । खरें कीं पाहा खोटें हें ॥१॥ न ह्मणां देह माझा ऐसा । मग भरवसा कळेल ॥ध्रु.॥ कैंचा धाक कैंचा धाक । सकळिक हें आपुलें ॥२॥ देव चि बरे देव चि बरे । तुका ह्मणे खरे तुह्मी ॥३॥

आपण अमर आहोत, आपण अमर आहोत; हे खरे की खोटे ते पडताळून पाहा. 'हा देह म्हणजे मी' असे म्हणू नका; मग खरा भरवसा मनाला कळून येईल. कसली भीती, कसली भीती? हे सगळे जग आपलेच आहे. देवच खरा आहे, देवच खरा आहे; तुकाराम म्हणतात, तुम्हीच खरे आहात.