बळियाचे अंकित । आह्मी जालों बळिवंत ॥१॥ ॥ ध्रु. ॥ लाथ हाणोनि संसारा । केला षडूर्मीचा मारा ॥२॥ जन धन तन । केलें तृणाही समान ॥३॥ तुका ह्मणे आतां । आह्मी मुक्तीचिया माथां ॥४॥

बलवानाचा (परमेश्वराचा) आश्रित झाल्यामुळे आम्हीही बलवान झालो. संसाराला लाथ मारून आम्ही सहा विकारांवर (कामक्रोधादी षड्‌ऊर्मींवर) हल्ला केला. लोक, धन आणि शरीर - हे सगळे आम्ही गवताइतकेच क्षुल्लक मानले. तुका म्हणतो, आता आम्ही मुक्तीच्या शिखरावर पोहोचलो आहोत.