आम्ही मागों ऐसें नाहीं तुजपाशीं । जरी तूं भीतोसि पांडुरंगा ॥१॥ ॥ ध्रु. ॥ पाहें विचारूनि आहे तुज ठावें । आम्ही धालों नावें तुझ्या एका ॥२॥ ऋद्धिसिद्धी तुझें मुख्य भांडवल । हें तों आह्यां फोल भक्तीपुढें ॥३॥ तुका ह्मणे जाऊं वैकुंठा चालत । बैसोनि निश्चित सुख भोगूं ॥४॥

हे पांडुरंगा, आम्ही तुझ्याकडे असे काही मागत नाही, ज्याची तुला भीती वाटावी. नीट विचार कर, तुला माहीत आहे - आम्ही फक्त तुझ्या एका नावानेच तृप्त आहोत. ऋद्धी-सिद्धी हे तुझे मुख्य भांडवल असेल, पण भक्तीपुढे ते आम्हाला अगदी क्षुल्लक आहे. तुका म्हणतो, आम्ही चालतच वैकुंठाला जाऊ, आणि तिथे स्वस्थ बसून सुख भोगू.