एक वेळ प्रायश्चित्त । केलें चित्त मुंडण ॥१॥ ॥ध्रु.॥ अहंकारा नांवें दोष । त्याचे ओस पाडिले ॥ अनुतापें स्नानविधि । यज्ञसिद्धि देहहोम ॥२॥ जीवशिवा होतां चुका । तेथे तुका विनटला ॥३॥

एकदाच खरे प्रायश्चित्त घेऊन मी मनाचे मुंडण केले. अहंकारापायी होणारे सगळे दोष मी उपटून टाकले. पश्चात्तापाने स्नान केले, आणि देहाचाच होम करून यज्ञ पूर्ण केला. जीव आणि शिव यांच्यातला भेद मिटला, तिथेच तुकाराम विरघळून गेले.