विचारा वांचून । न पवीजे समाधान ॥१॥ ॥ ध्रु. ॥ देह त्रिगुणांचा बांधा । माजी नाहीं गुण सुदा ॥२॥ देवाचिये चाडे । देवा द्यावे जें जे घडे ॥३॥ तुका ह्मणे होतें । बहु गोमटें उचितें ॥४॥

नीट विचार केल्याशिवाय मनाला समाधान मिळत नाही. हा देह तीन गुणांनी बांधलेला आहे, त्याच्यात शुद्ध असं काही नाही. देवाच्या ओढीपोटी जे जे घडेल, ते ते देवालाच अर्पण करावं. तुकाराम महाराज म्हणतात, असं केलं की सगळं फार चांगलं आणि योग्य होऊन जातं.