विठ्ठल नावाडा फुकाचा । आळविल्या साठीं वाचा ॥१॥ ॥ ध्रु. ॥ कटीं कर जेसे तैसे । उभा राहिला न बैसे ॥२॥ न पाहे शिदोरी । जाती कुळ न विचारी ॥३॥ तुका ह्मणे भेटी । हाका देतां उठाउठीं ॥४॥

विठ्ठल हा फुकटात होडी चालवणारा नावाडी आहे - फक्त हाक मारली की तो साथ देतो. जसा नेहमी असतो तसाच, कमरेवर हात ठेवून तो उभाच असतो, बसत नाही. तो तुमची शिदोरी बघत नाही, तुमची जात-कूळही विचारत नाही. तुकाराम महाराज म्हणतात, हाक मारताक्षणीच तो लगेच भेटीला येतो.