कृपावंत किती । दीनें बहु आवडती ॥१॥ ॥ ध्रु. ॥ त्यांचा भार वाहे माथां । करी योगक्षेमचिंता ॥२॥ भुलों नेदी वाट । करीं धरूनि दावी नीट ॥३॥ तुका ह्मणे जीवें । अनुसरतां एका भावें ॥४॥

देव किती दयाळू आहे - त्याला गरीब, लीन भक्त फार आवडतात. त्यांचं ओझं तो स्वतःच्या डोक्यावर घेतो, त्यांच्या हिताची, कल्याणाची काळजी करतो. त्यांना वाट चुकू देत नाही, हाताला धरून योग्य मार्ग दाखवतो. तुकाराम महाराज म्हणतात, जे मनापासून, एकनिष्ठ भावाने त्याला शरण जातात, त्यांच्यासाठी हे घडतं.