घेई माझे वाचे । गोड नाम विठोबाचें ॥१॥ ॥ ध्रु. ॥ तुह्मी घ्या रे डोळे सुख । पाहा विठोबाचें मुख ॥२॥ तुह्मी ऐका रे कान । माझ्या विठोबाचे गुण ॥३॥ मना तेथें धांव घेई । राहें विठोबाचे पायीं ॥४॥ तुका ह्मणे जीवां । नको सोडूं या केशवा ॥५॥

हे माझ्या वाणी, तू विठोबाचं गोड नाव घे. हे डोळ्यांनो, तुम्ही सुख घ्या, विठोबाचं मुख पाहा. हे कानांनो, तुम्ही माझ्या विठोबाचे गुण ऐका. हे मना, तिकडेच धाव, विठोबाच्या पायांशीच राहा. तुकाराम महाराज म्हणतात, हे जीवा, या केशवाला कधीच सोडू नकोस.