बाईल मेली मुक्त जाली । देवें माया सोडविली ॥१॥ ॥ध्रु.॥ विठो तुझें माझें राज्य । नाहीं दुसऱ्याचें काज ॥२॥ पोर मेलें बरें जालें । देवें मायाविरहित केलें ॥३॥ माता मेली मज देखतां । तुका ह्मणे हरली चिंता ॥४॥

बायको मेली आणि मी मुक्त झालो, देवाने मला मायेच्या बंधनातून सोडवलं. ॥१॥ ध्रु.॥ विठोबा, आता फक्त तुझं आणि माझं राज्य उरलं, दुसऱ्या कुणाशी माझा संबंध राहिला नाही. ॥२॥ मूल मेलं, तेही बरं झालं, देवाने मला त्या मायेतूनही सोडवलं. ॥३॥ माझ्या डोळ्यादेखत आई मेली, तुकाराम म्हणतात, माझी काळजी संपली. ॥४॥