लेकरा आयतें पित्याची जतन । दावी निजधन सर्व जोडी ॥१॥ ॥ ध्रु. ॥ त्यापरि आमचा जालासे सांभाळ । देखिला चि काळ नाहीं आड ॥२॥ भुकेचे संनिध वसे स्तनपान । उपायाची भिन्न चिंता नाहीं ॥३॥ आळवूनि तुका उभा पैलथडी । घातली या उडी पांडुरंगें ॥४॥

बापाची काळजी लेकरासाठी आधीच सज्ज असते, आपली सगळी साठवलेली संपत्ती, कमाई तो लेकरासमोर उघड करतो. त्याचप्रमाणे आमचाही सांभाळ झाला आहे, आमच्या वाटेत कधी मृत्यूचा अडथळाही आम्हाला दिसला नाही. भूक लागण्याआधीच जवळ स्तनपान सज्ज असतं, त्यासाठी वेगळी काही चिंता करावी लागत नाही. आर्त हाक मारून तुका पैलतीरी उभा आहे, पांडुरंगानेच त्याच्यासाठी ही उडी घातली.