इतुलें करीं देवा ऐकें हें वचन । समूळ अभिमान जाळीं माझा ॥१॥ ॥ ध्रु. ॥ इतुलें करीं देवा ऐकें हे गोष्टी । सर्व समदृष्टी तुज देखें ॥२॥ इतुलें करीं देवा विनवितों तुज । संतांचे चरणरज वंदीं माथां ॥३॥ इतुलें करीं देवा ऐकें हे मात । हृदयीं पंढरीनाथ दिवसरात्रीं ॥४॥ भलतिया भावें तारीं पंढरीनाथा । तुका ह्मणे आतां हरण आलों ॥५॥

देवा, एवढें कर, हें माझें म्हणणें ऐक - माझा अहंकार समूळ जाळून टाक ॥१॥ ध्रु.॥ देवा, एवढें कर, हें ऐक - मला सगळीकडे समदृष्टीनें तुलाच पाहूं दे ॥२॥ देवा, एवढें कर, मी तुला विनंती करतो - संतांच्या चरणधुळीला मी मस्तक नमवूं दे ॥३॥ देवा, एवढें कर, हें ऐक - पंढरीनाथ माझ्या हृदयात रात्रंदिवस वसो ॥४॥ हे पंढरीनाथा, कोणत्याही प्रकारें मला तार; तुका म्हणतो, आतां मी तुझ्या आश्रयाला आलो आहे ॥५॥