हरिपाठ
वैष्णवांची जोडी
नाम संकीर्तन वैष्णवांची जोडी । पापें अनंत कोडी गेलीं त्यांचीं ॥१॥ अनंत जन्माचें तप एक नाम । सर्व मार्ग सुगम हरिपाठ ॥२॥ योग याग क्रिया धर्माधर्म माया । गेले ते विलया हरिपाठें ॥३॥ ज्ञानदेवीं यज्ञ याग क्रिया धर्म । हरिविण नेम नाहीं दुजा ॥४॥
नामसंकीर्तन हीच वैष्णवांची जोडी आहे. त्यांची अनंत कोटी पापे नाहीशी झाली आहेत. एक नाम म्हणजेच अनंत जन्मांचे तप; सर्व मार्गांमध्ये हरिपाठ हाच सुगम मार्ग. योग, याग, कर्मकांड, धर्म आणि अधर्म, हे सारे हरिपाठाने विलयाला गेले. जग खरे भासवणारी मायाही तशीच विरून गेली. ज्ञानदेवांच्या मार्गात यज्ञ, याग, कर्मकांड आणि धर्म यांना हरीविना दुसरा कोणताही नेम नाही. जोडी म्हणजे माणसाने मिळवून गाठीशी बांधलेले धन. या भक्तांनी जोडलेले धन सोने-नाणे नाही; ते आहे गायलेले नाम.