मनाचे श्लोक
हनुमंताचा स्वामी
मना सज्जना हीत माझें करावें । रघूनायका दृढ चित्तीं धरावें । महाराज तो स्वामि वायूसुताचा । जना उद्धरी नाथ लोकत्रयाचा ॥
हे सज्जन मना, माझे हित कर: रघुनायकाला चित्तात दृढ धरून ठेव. तो महाराज आहे; वायुपुत्र हनुमान त्याला आपला स्वामी मानून त्याची सेवा करतो. तो त्रैलोक्याचा नाथ आहे, आणि तो जनांचा उद्धार करतो. समर्थ राम आणि हनुमान या दोघांचेही उपासक होते. काळ आयुष्य घेऊन जाण्याआधी आपली वाणी आणि आपले दिवस रामाला द्यावेत: येथून पुढचे श्लोक याच विषयाकडे वळतात.