आत्माराम चहुंकडे । लोक वावडे जिकडे तिकडे ।
देहे पडे मृत्य घडे । आत्मयाविण ॥ ५ ॥
आत्माराम, म्हणजे सर्वांच्या अंतरात रमणारा आत्मा, चारी बाजूंना व्यापून आहे. लोक जिकडे तिकडे वावरत असतात. त्या आत्म्याविना मात्र देह पडतो, आणि मृत्यू घडतो.
आत्मारामाच्या या समासाच्या आरंभी समर्थ गणपती, वाणी आणि आपल्या उपास्य श्रीरामाचे नाम यांना नमन करतात, आणि मग परात्पर परमेश्वराकडे, आत्म्याकडे वळतात.
पुढच्या ओवीत ते सांगतात, जीवात्मा, परमात्मा, अंतरात्मा अशा अनेक नावांनी हाच एक आत्मा देव, दानव आणि मानव या सर्वांत वसतो.