निवडक दासबोध ओव्या · The Guru and the Seeker
जे वस्तु परम दुल्लभ · दासबोध १.५.२
जे वस्तु परम दुल्लभ । जयेचा अलभ्य लाभ । तेंचि होये सुल्लभ । संतसंगेकरूनी ॥ २॥
संतांच्या स्तवनाचा हा समास. त्याच्या आरंभी समर्थ परमार्थाचा आधार असलेल्या सज्जनांना वंदन करतात; त्यांच्यामुळेच गुह्य ज्ञान लोकांत प्रकट होते. समर्थ म्हणतात, जी वस्तू परम दुर्लभ आहे, जिचा लाभ मिळणे अशक्यच वाटते, तीच संतांच्या संगतीने सुलभ होते. ही वस्तू म्हणजे परमात्मतत्त्व. पुढच्या ओव्यांत ते सांगतात, ती प्रकटच आहे, तरी कोणालाच दिसत नाही. दिव्याने, चंद्राने, तळपत्या सूर्यानेही ती दाखवता येत नाही; ती संतसंगानेच कळते.