हातीं द्रव्याची जपमाळ । कांताध्यान सर्वकाळ ।
सत्संगाचा दुष्काळ । या नांव बद्ध ॥ ३९॥
बद्धाच्या लक्षणांचा हा समास. बद्ध म्हणजे प्रपंचात पूर्णपणे जखडलेला माणूस. समर्थ त्याची एकामागून एक लक्षणे सांगतात, आणि प्रत्येक ओवीच्या शेवटी म्हणतात: याचे नाव बद्ध.
त्याच्या हातात जपमाळ असते, पण ती पैशाची. ध्यान सतत चालू असते, पण बायकोचे. आणि सत्संगाचा, म्हणजे सज्जनांच्या संगतीचा, त्याच्याकडे दुष्काळ असतो. याचे नाव बद्ध, असे समर्थ म्हणतात.