तुकारामांचे निवडक अभंग
अभंग ४३११: कोणी निंदा कोणी वंदा
कोणी निंदा कोणी वंदा । आह्मां स्वहिताचा धंदा ॥१॥ काय तुह्मांसी गरज । आह्मी भजूं पंढरिराज ॥ध्रु.॥ तुह्मांसारिखें चालावें । तेव्हां स्वहिता मुकावें ॥२॥ तुका ह्मणे हो कां कांहीं । गळ दिला विठ्ठल पायीं ॥३॥
कोणी आमची निंदा करो, कोणी आम्हाला वंदन करो; आमचा उद्योग एकच, आपले खरे हित साधणे. आम्ही पंढरीच्या राजाचे, विठ्ठलाचे भजन करतो; त्याच्याशी तुमचे काय देणेघेणे? तुमच्यासारखे वागलो, तर आम्ही आपल्या हिताला मुकू. तुकाराम महाराज म्हणतात, आता काहीही होवो; मी आपला गळ विठ्ठलाच्या पायांशी अडकवून दिला आहे.