तुकारामांचे निवडक अभंग
अभंग ५१: आलिंगनें घडे
आलिंगनें घडे । मोक्ष सायुज्यता जोडे ॥१॥ ऐसा संताचा महिमा । जाली बोलायाची सीमा ॥ध्रु.॥ तीर्थें पर्वकाळ । अवघीं पायांपें सकळ ॥२॥ तुका ह्मणे देवा । त्यांची केली पावे सेवा ॥३॥
संतांनी आलिंगन दिले, की मोक्ष मिळतो; देवाशी एकरूप होण्याची सायुज्य मुक्ती जोडली जाते. संतांचा महिमा असा आहे, की तो सांगताना बोलण्याचीच सीमा येते. सगळी तीर्थे आणि सगळे पवित्र पर्वकाळ त्यांच्या पायांशी येऊन मिळालेले असतात. तुकाराम महाराज म्हणतात, संतांची केलेली सेवा देवापर्यंत पोहोचते.