मनाचे श्लोक
देहदंडाची गरज नाही
देहेदंडणेचें महां दु:ख आहे। महां दु:ख तें नाम घेतां न राहे। सदाशीव चिंतीतसे देवदेवा। प्रभाते मनीं राम चिंतीत जावा॥
देहाला दंड देण्यात मोठे दुःख आहे. रामनाम घेतले की ते मोठे दुःख उरत नाही. सदाशीव, खुद्द शंकर, त्या देवाधिदेवाचे सदा चिंतन करतो. पहाट होताच मन रामावर असावे. कठोर तप म्हणजे दीर्घ उपवास, भर उन्हात उभे राहणे, किंवा रात्रभर थंड पाण्यात बसणे. नामाला यातले काहीच लागत नाही. देवांमध्ये शंकर हा मोठा तपस्वी; तरीही त्याचे स्वतःचे चिंतन देवाधिदेवावर स्थिर असते. ध्रुपदावरून कळते, की येथे तो देव म्हणजे राम.