मनाचे श्लोक
येरझारा चुकव
मना वासना चूकवी येरझारा । मना कामना सांडिं रे द्रव्यदारा । मना यातना थोर हे गर्भवासीं । मना सज्जना भेटवीं राघवासी ॥
हे मना, वासनेमुळे चालणाऱ्या या येरझारा चुकव. धनाची आणि स्त्रीची कामना सोडून दे. गर्भवासातली यातना मोठी आहे. हे सज्जन मना, मला राघवाची भेट घडव. येरझारा म्हणजे विहिरीवर किंवा बाजारात पुन्हा पुन्हा होणारे जाणे-येणे. समर्थ हा शब्द जन्ममरणाच्या फेऱ्यासाठी वापरतात; वासनाच हा फेरा चालू ठेवते. शेवटच्या ओळीत समर्थ स्वतःच्याच मनाला विनवतात: मला रामापर्यंत घेऊन चल.