निवडक दासबोध ओव्या · Worldly Life Done Well
बहुतां जन्मांचा सेवट · दासबोध ११.३.१-२
बहुतां जन्मांचा सेवट । नरदेह सांपडे अवचट । येथें वर्तावें चोखट । नितिन्यायें ॥ १ ॥ प्रपंच करावा नेमक । पाहावा परमार्थविवेक । जेणेंकरितां उभय लोक । संतुष्ट होती ॥ २ ॥
अनेक जन्मांच्या शेवटी हा नरदेह, म्हणजे माणसाचा जन्म, अचानक हाती लागतो. म्हणून येथे नीतीने आणि न्यायाने, चोख वागावे. प्रपंच नेमका, नीट मोजूनमापून करावा. आणि परमार्थाचा विवेक पाहावा, म्हणजे खरे काय आणि नश्वर काय, याचा विचार ठेवावा. त्याने इहलोक आणि परलोक, दोन्ही लोक संतुष्ट होतात. याची निकड समर्थ पुढच्या ओव्यांत सांगतात. शंभर वर्षांच्या आयुष्यात बालपण नकळत जाते, तारुण्य विषयांत खर्च होते, आणि म्हातारपणी नाना रोग भोगावे लागतात. मग भगवंताच्या योगाला वेळ कधी?